Biahe di trabou importante pa Konseho Insular pa den Haag pa deliberá tokante WOLBES i FINBES
Di 16 te ku 26 di mart, lidernan di frakshon di Konseho Insular – Rolanda Hellburg-Makaai, Daisy Coffie, Benito Dirksz, Humphrey Wout Jr. i Cyrill Vrolijk – huntu ku e griffier, e Diputado pa asuntunan Intergubernamental i Regional i e konsehero pa e islanan BES, señor Van Rijn, lo hasi un biahe di trabou pa Hulanda.
E biahe aki ta marka un momentu krusial den e proseso di revishon di “Wet Openbare Lichamen BES (WOLBES) i e Financiële Verhoudingen BES (FINBES)”.
Islanan BES a manda un karta di reakshon konhunto tokante e aktuashon di e sekretario di estado di Relashonnan di Reino den kuadro di e leinan aki. Esaki ta enfatisá importansia di e diálogonan ku lo tuma lugá na Hulanda. Durante e biahe di trabou, e delegashon tin sita ku Komishon Fiho pa Asuntunan di Reino di Tweede kamer i di Eerste kamer i tambe ku e sekretario di estado di Relashonnan di Reino.
Konseho Insular ta enfatisá ku diálogonan personal ku e tópikonan aki tin hopi importansia. Ta fundamental pa sinta na mesa huntu pa logra meta konkreto i pa sigurá ku e leinan ta reflehá e realidat i e nesesidatnan di e islanan. E delegashon ta dediká pa fortalesé e posishon gubernamental i finansiero di islanan BES i ta traha riba mehorashon struktural den e leinan.