Delegashon di Konseho Insular ta wak bek na un biahe fruktífero na Aruba.
Delegashon di Konseho Insular di Boneiru ku a konsistí di konsehalnan Benito Dirksz, lider di e delegashon huntu ku konsehalnan Cyrill Vrolijk i Daniel Crestian ta wak bek riba u bishita na Aruba fruktifero ku diferente kombersashon intersante.
E delegashon a reuní ku señor Ursell Arends, minister demishonario na Aruba enkargá ku Transporte, Integridat, Naturalesa i maneho di grandinan.
Durante di e reunion a konsentrá riba e maneho di transporte públiko pa loke ta trata e parti di pèrmitnan pa taksi en partikular i di e parti di transporte públiko en general kual ta konsistí di outo bus i busnan mas grandi.
Minister Arends a duna informashon amplio riba e maneho pa ku transporte públiko na Aruba i kon e parti di proseso pa yega na otorgamentu i prolongashon di pèrmitnan ta tuma lugá na hermana isla Aruba. E delegashon di Boneiru a haña un bon bista den e ordenansanan ku ta regla maneho di transporte públiko na Aruba.
Boneiru tin su retonan pa ku transporte públiko bou di e ordenansanan aktual i ta importante pa Boneiru den e fase inisial di revishon for di awor aki por yega na un maneho balansa i responsabel pa loke ta trata transporte públiko.
Durante di revishon di e ordenansanan ku ta regla transporte públiko na Boneiru, Konseho Insular lo por hasi uso di métodonan den region ku lo por funshoná pa Boneiru sin tin mester di re-inventá e wil.
E delegashon di Konseho Insular a gradisí minister Arends pa su disponibilidat di a kompartí e vishon i e maneho ku Aruba ta hibando na pais Aruba pa loke ta trata transporte públiko.
Tambe durante e biahe di trabou na Aruba e delegashon di Konseho Insular a bai un seshon di informashon di e di 9 edishon di e “Trade Mission Agroalimentaria 2025” kual lo tuma lugá na Repúblika Dominikana di 28 pa 31 di Mei 2025. Organisá pa ministerio di asuntunan ekonómiko, komunikashon i desaroyo sostenibel di pais Aruba huntu ku e sentro di eksportashon i invershon di Repúblika Dominikana (ProDominicana), “The Dominican Agribusiness Board (JAD) i Konsulado General di Repúblika Dominikana na Aruba,
E delegashon di Konseho Insular di Boneiru ku a konsistí di konsehalnan Benito Dirksz, Cyrill Vrolijk i Daniel Crestian tabata presente na e seshon di informashon pa asina por risibí informashon di e evento na kual mas ku 250 eksportador nashonal di Repúblika Dominikana lo ekshibí e mihó produktonan “agro-food” i produktonan agro-industrial. Aproksimadamente 78 diferente nashonalidat lo partisipá na e “Trade Mission”.
Produktonan alimentario pa loke ta trata entre otro bèrdura i fruta na Boneiru tin su retonan relashoná ku suministro kontinuo di esaki nan na preisnan pagabel pa e komunidat.
E merkadonan di Kòrsou i di Aruba ya ta risibiendo produktonan for di Repúblika Dominikana kada 2 siman den kontenedornan ku e kompania di barku “Don Andres”.
Tin un posibilidat pa komèrsio di Boneiru tambe por eksplora e fasilidatnan ku ta brinda den e “Trade Mission” na Repúblika Dominikana pa por abastese i komplementá di un forma struktura e merkado di Boneiru ku produktonan agroalimentario na un preis mas kompetitivo i/o pagabel.
E delegashon di Konseho Insular lo transmití e informashonnan risibí pa Kolegio Ehekutivo pa asina nan por sigui enkamina e proseso ku e diferente “stakeholders” na Boneiru riba e posibilidatnan menshoná mas ariba.
Riba djabièrnè 14 di mart 2025, Parlamento di Aruba a risibi e delegashon di Konseho Insular di Boneiru pa un reunion di interkambio riba diferente tópikonan di importansia i di e reto i desafionan ku tantu pais Aruba i Boneiru komo Entidat Públiko ta eksperensia den Reino Hulandes.
A elaborá riba diferente posibilidat pa yega entre otro na un plataforma di diálogo i di interkambio riba asuntunan di interes mutuo, di kolaborashon i di sosten na otro entre e 6 islanan di eks-Antias.
Boneiru pa medio di su Komishon Fiho den Konseho Insular pa asuntunan Interinsular i di Reino lo prepará e kuadronan den konsepto pa por yega na e plataforma pa asina por tene e promé reunion den e di 3 kuartal di 2025 na Boneiru entre Kòrsou, Aruba, St. Maarten, St. Eustatius, Saba i Boneiru.
No opstante di e kambionan di struktura ku a tuma lugá konstitushonalmente i ku por parse di por ta alehá e 6 islanan for di otro, e islanan, kada un ku nan propio kultura i situashonnan ku ta diferensia for di otro, lo por nifiká hopi pa otro na momento ku mester ta uni ku otro den e diferente retonan ku kada isla òf pais ta konfronta.
E delegashon di Boneiru ta gradisí Parlamento di Aruba pa nan disponibilidat di a risibí, interkambiá i di ta prepará pa uni den un plataforma di interkambio i kooperashon entre e 6 islanan di èks Antia.
Tambe riba 18 di mart; dia di himno I bandera di Aruba, e delegashon di Boneiru ku a konsisti di Benito Dirksz, Cyrill Vrolijk, Daniel Crestian I James Kroon a selebrá huntu ku nos hermana isla di Aruba. Ta yama danki na minister di Kultura pa e invitashon I ta semper un plaser pa selebrá i duna honor na nos hermana isla.