Delegashonán di BES na Hulanda pa diskutí revishonan di WolBES i FinBES
Un delegashon ku ta representá e islanan Boneiru, Sint Eustatius i Saba ta aktualmente na Hulanda pa un seri di reunionnan na Den Haag. E diskushonnan ta enfoká riba e revishonnan ku ta tumando lugá den e leinan WolBES i FinBES.
Aunke durante e konferensia di trabou den mart 2024 tabata a logra akuerdo kolektivo entre e eks-sekretario di Estado di relashonnan di Reino i e representante di e islanan, e sekretario di estado nobo a manda un karta den febrüari indikando su intenshon pa kambia sierto akuerdo unilateralmente. Esaki a lanta preokupashonnan serka e islanan.
Komo reakshon, a bini huntu den e kumbre BES na Saba den febrüari 2025, aki e islanan a akordá pa skibi un karta formal ekspresando nan opheshon riba e manera kon e sekretario di estado a prosedé. Komo resultado e delegashon nan ta reuní ku entidatnan klave den e gobièrnu sentral na Hulanda pa diskutí e preokupashonnan aki personalmente.
Djaweps 20 di mart a tuma lugá un reunion krusial ku miembro di Komishon di Asuntunan di Reino di Tweede Kamer. E delegashon di e islanan a enfatisá ku ta esensial pa envolví e islanan den asuntunan ku ta toka e islanan. E preokupashon prinsipal no ta solamente e kambionan proponé, sino mas tantu e manera unilateral ku e sekretario di estado ta implementá e kambionan sin konsultá ku e persona nan ku e desishonnan lo afektá.
E miembronan di Komishon i e delegashon konhunto a tene un diskushon abierto. Puntonan esensial di diskushon tabata nesesidat di konsulta mas frekuente i komunikashon pa oumentá klaridat, komprenshon mutuo i harmonia pa ku e nesesidatnan di e islanan. E prinsipio "si ta tokante di nos, no sin nos" a resoná komo un prinsipio importante di bon gobernashon durante e seshon aki.
E delegashonnan a afirmá nan kompromiso pa diálogo konstruktivo i a suprayá nesesidat di mantené un proseso di konsulta inklusivo. E reunion a resaltá importansia di kolaborashon kontinuo pa garantisá ku e bos di Boneiru, Sint Eustatius i Saba ta keda integral den e proseso di toma di desishon ku ta afektá nan gobernashon i futuro.