Enkuentro entre UNESCO, Kien, Natcom NL ku Konseho Insular i Kolegio Ehekutivo di Boneiru.

Un delegashon chikitu di e Komishon Nashonal Di UNESCO (Natcom) di Hulanda tabata presente na Boneiru. E delegashon tabata konsistí di Sekretario General Marielies Schelhaas, Presidente di direktiva Kathleen Ferrier, miembro di direktiva Dr. Marlon Titre, direktor di e sentro di konosementu di patrimonio intangibel Di Hulanda (KIEN), Dr. Saskia van Oostveen i Liliane de Geus, lider di e grupo di trabou di Boneiru pa UNESCO.

Durante e reunion, a duna atenshon spesial na e kambionan di membresia pa Boneiru despues di 10-10-10 i na e implementashon di proyektonan bou di guia di KIEN i Natcom. Kada organisashon a hasi un introdukshon, siguí pa un interkambio di opinion balioso entre e bishitantenan, miembronan presente di Konseho Insular , miembronan di Kolegio Ehekutivo i griffie. 

Ademas, a papia tokante kon e metanan di UNESCO por wòrdu realisá mihó den e konstelashon aktual di Boneiru. Durante e reunion tambe a enfatisá un biaha mas kon spesial ta ku e palu mas bieu di Reino Hulandes ta na Boneiru i ku esaki tin mas di 1000 aña. Esaki ta suprayá un biaha mas kon importante ta e kompromiso di Boneiru pa ku konservashon di naturalesa i patrimonio kultural.

E interkambio aki ta nesesario pa informá Konseho Insular tokante tópikonan importante den sosiedat. Pa medio di e reunionnan aki, e miembronan di  Konseho Insular ta keda informá di desaroyonan relevante i por tuma desishonnan ku ta kontribuí na futuro di Boneiru, ku bista tantu riba patrimonio kultural komo desaroyo sostenibel.