Konseho Insular di Boneiru ta bishitá Hulanda pa fortales’é kolaborashon i koordinashon.

Un delegashon di Konseho Insular di Boneiru a hiba un bishita di trabou na Hulanda for di 24 te ku 29 di yanüari 2025. Durante e bishita aki, e enfoke tabata pa fortales’é e kolaborashon ku diferente instansia gubernamental i koordiná proseso gubernamental i demokrátiko. 

. E delegashon, ku ta konsistí di Désirée Coffie, Benito Dirksz, Cyrill Vrolijk i Salma Serberie, huntu ku griffier, a tene kombersashonnan ku Ministerio di Asuntunan Interno i Relashonnan den Reino (BZK),  munisipio di Den Haag, munisipio di Albrandswaard i a asistí na un presentashon di hóbennan Boneriano.

Tópiko i palabrashonnan importante:

Ministerio di Asuntunan interno i Relashonnan den Reino (BZK)
Durante e kombersashon ku Direktor-General di Relashonnan den Reino i e direktor di BZK, a papia tokante e progreso di palabrashonnan ku a hasi na de Bilt. Ademas, a koordiná e provishon di informashon i kolaborashon entre BZK i Konseho Insular, ku atenshon spesial riba e sistema demokrátiko di Boneiru komo organismo públiko. A papia tambe riba e papel di e representante di Reino i e adaptashon di vishon tokante su funshon i tambe e fortifikashon di e ròl di kontrolá di Konseho Insular. Pa finalisá, a duna atenshon na e nesesidatnan di sosten i solushonnan a base di proyekto pa algun kasonan urgente di Boneiru.

Munisipio di Den Haag
Konseho Insular a tene un kontinuashon di un sita ku e griffier di munisipio di Den Haag tokante e proseso di investigashon di Konseho Insular. Ademas, a analisá e metodologia pa maneho di gastunan i e preshon laboral ku ta kresiendo riba miembronan di Konseho Insular.

Munisipio di Albrandswaard
A tuma lugá un momento pa sera konosí ofisial i koordinashon ku e munisipio Albrandswaard pa eksplorá kolaborashon i e programa di sosten pa e miembro di konseho i e griffier. Esaki ta akordá den e Akuerdo di Entendimentu (MoU) firma anteriormente.

Presentashon di bukinan pa hubentut Boneriano – BIT Lab

Konseho Insular a asistí na e presentashon di e buki di e organisashon di hóben BIT Lab. Durante e evento aki, a trata e posibilidat di duna mas sosten na investigashon tokante Boneiru. E representante di pueblo a ekspresá nan sosten pa inisiativa ku ta kontribuí na e desaroyo di  hóbennan Boneriano.

Koordinashon atministrativo

Ademas di e diálogonan gubernamental, griffier di Konseho Insular a tene koordinashon atministrativo ku diferente instansia, entre otro:

  • Direktor i funshonario di BZK: Koordinashon tokante komunikashon i konsulta di leinan.
  • Ministerio di Hustisia i Seguridat (JenV): Kombersashon tokante e método di trabou i koordinashon di provishon di informashon na Konseho Insular.
  • Representante di Asosashon di Grifíernan: Koordinashon riba pakete di sosten pa griffiernan i nesesidatnan di miembronan di Konseho Insular.

Fortalesé kolaborashon i desaroyo gubernamental

Konseho Insular ta mira bèk riba un bishita di trabou balioso i produktivo. E palabrashon nan ku a logra lo kontribuí na e fortifikashon di gobernashon lokal na Boneiru. Konseho Insular ta sigui komprometé ku transparensia, kolaborashon efisiente i mehorashon di proseso gubernamental na benefisio di tur siudadano di Boneiru.