Miembronan di Konseho Insular ku bishita di trabou na Aruba

Riba 13 di mart, tin reunionnan programá, inkluso un diálogo ku Minister Arends tokante transporte públiko i lisensia pa taksi. E diálogo aki ta duna e miembronan di Konseho Insular e oportunidat pa profundisá den e maneho i e posibel desafionan di e tema aki. Di e forma aki akumulá konosementu pa tin un mihó bista i aserkamentu pa e proseso di un maneho pa transporte públiko na Boneiru.

Mesun dia, lo tin un seshon di informashon tokante un proyekto di agrikultura. Durante e seshon aki, e miembronan di Konseho Insular lo risibí mas informashon tokante posibilidatnan pa kreá alternativa pa importashon di produktonan i pa logra mas outarkia.

Riba 14 di mart, e miembro di Eilandsraad lo tin un enkuentro di sera konosí ku parlamento di Aruba. Durante e enkuentro aki, nan lo tene un interkambio di ideanan tokante desaroyo regional i fortalese di kolaborashon polítiko entre Boneiru i Aruba.

Tambe riba 14 di mart, e miembro di Konseho Insular lo bishitá Alto Vista Winery, kaminda nan lo risibí un tour i diskutí posibilidatnan pa proyekto similar na Boneiru. E proyektonan aki lo ta enfoká riba kreashon di empleo i desaroyo di produkto, ku e meta pa stimulá kresementu ekonómiko pa nos isla.

Riba 17 di mart, nan lo tene un enkuentro ku organisashon Santa Rosa, kaminda nan lo asistí na un proyekto di hydrophonics. E proyekto aki ta ilustrá desaroyonan inovativo den agrikultura sostenibel.

E selebrashon kultural pa Dia di Aruba lo tuma lugá riba 17 di mart, sigui pa e selebrashon protokolar riba 18 di mart. E miembronan di Konseho Insular lo tuma parti den e evento aki.

E bishita di trabou aki ta representá un paso fundamental den kolaborashon entre Boneiru i Aruba, pa stimulá interkambio di konosementu i kooperashon pa desaroyo kontinuo di e dos islanan.